ស្ទឹងត្រែង៖ មន្ទីរទេសចរណ៍ខេត្តស្ទឹងត្រែងរៀបចំដំណើរទស្សនកិច្ចជាកញ្ចប់ បំរើសេវាកម្មជូនភ្ញៀវទេសចរ នៅក្នុងឱកាសបុណ្យចូលឆ្នាំប្រពៃណីជាតិខ្មែរ តាមតំបន់មានសក្តានុពលទេសចរណ៍នៃដងទន្លេមេគង្គលើ ជំនួសការទស្សនាសត្វផ្សោតដែលបានស្លាប់បាត់បង់ទៅអស់ហើយនោះ។
យោងតាមការចុះផ្សាយរបស់អគ្គនាយកដ្ឋានវិទ្យុជាតិ ក្នុងឱកាសចុះពិនិត្យសក្តានុពលធម្មជាតិនៅតាមដងទន្លេមេគង្គ កាលពីថ្ងៃទី២០ ខែកុម្ភៈ ឆ្នាំ២០២២ ប្រធានមន្ទីរទេសចរណ៍ខេត្តស្ទឹងត្រែងលោក អ៊ន ប៉ាសឿន បានឱ្យមន្ត្រីសហគមន៍ដឹកជញ្ជូនរៀបចំឱ្យមានសុវត្ថិភាពដល់ភ្ញៀវទេសចរ។ លោកបន្តថា ទីតាំងត្រូវទៅទស្សនារួមមាន តំបន់ប្រវត្តិសាស្ត្រព្រះសាខន ទីតាំងភ្នំកំបោរ ល្អាងភ្នំប្រាក់ តំបន់សម្រស់កោះហាន ទេសភាពតំបន់រ៉ាមសារ និងទស្សនាសត្វស្លាបនៅតាមដងទន្លេមេគង្គលើ ជំនួសឲ្យការទស្សនាសត្វផ្សោតនៅកោះឈើទាលដែលបានស្លាប់អស់។
លោកប្រធានមន្ទីរបញ្ជាក់ថា កិច្ចការងារទាំងនេះមន្ទីរធ្លាប់បានណែនាំរួចមកហើយ ឱ្យរៀបចំសេវាកម្មទេសចរណ៌ឱ្យបានល្អ ទូកសម្រាប់ដឹក ជញ្ជូនភ្ញៀវ ទីតាំងស្នាក់នៅអង្គុយកម្សាន្ត ម្ហូបអាហារមានអនាម័យ តម្លៃសមរម្យ ដើម្បីរួមគ្នាលើកស្ទួយវិស័យទេសចរណ៍នៅក្នុងស្រុកឱ្យមានភាពរីកចម្រើនឡើង។
ប្រជាសមាគមន៍អេកូទេសចរណ៍បុរីអូរស្វាយសែនជ័យលោក គង់ ចន្ទី បានទទួលយកការណែនាំនេះហើយប្រជាសហគមន៍នឹងរៀបចំឱ្យបានត្រឹមត្រូវតាមការចង់បាន ដើម្បីជូនដំណើរភ្ញៀវទេសចរមកកម្សាន្តឱ្យសប្បាយនិងប្រកបដោយសុវត្ថិភាព។
លោកបន្តថា ការរៀបចំបានល្អពិតជាធ្វើឱ្យភ្ញៀវទេសចរពេញចិត្តមកលេងម្តងហើយ ចង់មកម្តងទៀត ហើយក៍៏បានលើកកម្ពស់វិស័យទេសចរណ៍ក្នុងស្រុក ប្រយោជន៍ជួយដល់បងប្អូនប្រជាពលរដ្ឋយើងដែលរស់នៅតាមតំបន់នីមួយៗរកបានប្រាក់ចំណូលផង ។
ភ្ញៀវទេសចរមកពីខេត្តត្បូងឃ្មុំធ្លាប់មកលែងតំបន់នេះ លោក ឈី ដារ៉ាវុទ្ធ បានទទួលស្គាល់ថា នៅតាមដងទន្លេមេគង្គលើ នៃតំបន់រ៉ាមសារមានទេសភាពល្អសម្រាប់ទស្សនាដូចជាធនធានជីវចម្រុះ តំបន់កោះ ព្រៃលិចទឹក ដើមឈើធំៗមានឫសវែងអន្លាយ និងសត្វស្លាបជាដើម។
សូមបញ្ជាក់ថា ខេត្តស្ទឹងត្រែងត្រូវបានមន្ទីរទេសចរណ៍បានដាក់បញ្ចូលតំបន់អេកូទេសចរណ៍ សម្រស់កោះហាននិងបុរីអូរស្វាយសែនជ័យនេះ ធ្វើជាគំរូចូលរួមប្រកួតប្រជែងគ្នា ក្នុងសហគមន៍ទេសចរណ៍ឦសាន្តសម្រាប់ឆ្នាំ២០២២-២០២៥ ដើម្បីឱ្យថ្នាក់ជាតិវាយតម្លៃពីគុណភាព សោភ័ណភាព និងទទួលយកលិខិតបញ្ជាក់ឬបណ្ណសរសើរពីក្រសួងទេសចរណ៍៕
